Human sa pipila ka buwan nga hinuwatay, ang mga pamilya nga nawad-an og panimalay tungod sa sunog ug pagdahili sa yuta sa sayong bahin ning tuiga, sa katapusan, nakadawat na gayud og tabang pinansyal gikan sa Gobyerno sa Dakbayan sa Sugbo.
Gani, sa maong tabang pinansyal nga gitanyagm gipangulohan kini ni Cebu City Mayor Nestor Archival, inubanan sa Department of Social Welfare Services (DSWS) head, Portia Basmayor.
Ang pagpang apod-apod sa maong hinabang gipahigayon sa Cebu City Hall, subay sa pagsiguro nga ang mga benepisyaryo nga wala masakop sa unang pag-apod-apod nakadawat sa ilang tabang.
Ang pinakabag-o nga payout nakabenepisyo sa 189 ka mga benepisyaryo gikan sa 13 ka mga barangay, lakip ang Inayawan, Guadalupe, Tisa, Tinago, Tejero, Mambaling, Talamban ug Kalunasan, samtang ang mga tag-iya sa balay nga naapektuhan sa mga katalagman nakadawat og P20,000 matag usa, samtang ang mga nag-abang gihatagan og P10,000.
Matod pa ni Mayor Archival, nasabtan niya ang kalisud nga naagian sa mga benepisyaryo ilabi na tungod sa sunog, hinungdan nga nanghinaot kini ang pinaagi sa maong tabang pinansyal, makatabang sa pagbangon pag-usab sa mga biktima, ug magpadayon sa pagsuporta kanila sa tibuok nilang pagbangon.
Subay niini, nagkanayon nga ang tabang pinansyal kabahin sa nagpadayon nga mga paningkamot sa siyudad sa Sugbo sa pagtubag sa kalamidad, nga nagsugod niadtong Enero human sa sunod-sunod nga mga kalamidad nga nakapahawa sa gatusan ka mga pamilya.
Lakip sa mga dagkong insidente karong tuiga mao ang sunog sa Barangay Ermita nga nagbilin og halos 100 ka mga pamilya nga walay puy-anan, ug ingun man daghang mga barangay sa kabukirang bahin sa Sugbo ang nakasinati usab og mga pagdahili sa yuta nga nakadaot sa mga balay, kabtangan ug mga tinubdan sa panginabuhi.
Human sa mga katalagman, ang gobyerno sa siyudad naghatag og temporaryong mga puy-anan, mga food packs ug mga materyales sa pabalay, samtang nakig-alayon sa mga ahensya sa nasud sama sa Department of Social Welfare and Development (DSWD) ug Department of Labor and Employment (DOLE) alang sa dugang nga tabang.
