CEBU CITY-Nangayo ang executive department sa Cebu City Government og dugang P205,974,032 alang sa Palarong Pambansa.
Gitino ni City Councilor Noel Wenceslao, chairman sa committee on budget and finance, nga gipirmahan na ni Mayor Michael Rama ang maong hangyo, nga maapil sa unang supplemental budget nga wala pa mahatag nga gisumiter sa Konseho sa Lungsod.
Dugang pa, nga ang maong kantidad labaw pa sa giaprobahan nga P200 milyones nga gigahin alang sa maong kalihokan, diin gilangkuban sa rehabilitasyon sa Cebu City Sports Center, ang nag-unang venue sa tinuig nga multi-sport event.
Sa pikas bahin, gitataw ni City Councilor Donaldo Hontiveros nga ang dugang pundo maglangkob sa pag-instalar sa LED outdoor-field lights sa CCSC nga mokabat sa P23 milyones, ang pagtukod ug pag-instalar sa digital-visual LED display with support frames ug mga poste nga nagkantidad og P135.186 milyones ug ang pagtukod sa grandstand extension nga mokabat sa P47 milyones.
Dugang pa, nga ang rason nga nangayo sila og dugang pondo tungod ang mga installations ug constructions wala maapil sa inisyal nga P200 milyones budget dihang naaprobahan kini.
