CEBU CITY-Nagpadayon ang pagpangandam sa Cebu City government sa ipahigayon nga Buhing Kalbaryo karung umaabot nga Marso 29 o sa Biyernes Santo.
Gipahibalo ni Jojo Labella, ang organizer sa Buhing Kalbaryo, nga ilahang gitinguha karun nga mapanindot ug mas mapalambo pa ang kalihokan ilabi na nga kagustohan ni Cebu City Mayor Michael Rama nga mapadangat sa katawhan ang tumong ug mensahe sa ilahang drama nga gitawag og “Dula sa Pangamuyo”.
Gumikan kay tinuig kini nga gipahigayon, karung tuiga, adunay kalahi-an nga ipagawas apan nagbasi sa gihapon sa kinabuhi ni Hesu Kristo nga nakalatid sa bibliya.
Matud pa, mikabat sa duha ngadto sa tulo ka buwan ang pagpangandam sa kinatibuk-ang 110 ka mga casts sa maong relihiyoso ug ispiritwal nga kalihokan.
Magsugod ang Buhing Kalbaryo alas 10 sa buntag nga sugdan sa Archdiocesan Shrine of San Nicolas de Tolentino Parish, molagbas sa V.Rama Avenue ug paingon sa Guadalupe.
Gitino usab ni Labella nga lakip sa ilahang pagpangandam mao ang seguridad hinungdan nga nakig-alayon na usab sila sa Cebu City Police Office, uban pang mga units, ingon man ang dagan sa trapiko pinaagi sa Road Management Authority.
