Napakyas ang Cebu City Government sa pag-apod-apod sa kinatibuk-ang P280.75 milyon nga bahin sa 80 ka barangay gikan sa koleksyon sa Real Property Tax (RPT) sulod sa unom ka tuig, sumala sa 2025 Audit Report sa Commission on Audit (COA).
Matud sa COA, ang maong pundo, nga natigom gikan sa fiscal years 2020 hangtod 2025, mao ang 30 porsyento nga mandatory share sa mga barangay gikan sa advance RPT collections.
Apan, wala kini marekord isip obligasyon ug wala usab ma-release sa mga barangay sumala sa gikinahanglan sa balaod.
Gipasidaan sa COA nga ang maong kalapasan nakaapekto sa pagpondo sa mga batakang serbisyo ug proyekto sa mga barangay ug maoy usa sa mga hinungdan nga nakahatag sa siyudad og “qualified opinion” sa iyang 2025 financial statements.
Sa tubag sa COA, giingon sa mga opisyal sa siyudad nga ang kalangan namugna tungod sa mga technical issues ug software discrepancies.
Nagpadayon na karon ang City Accounting Office, City Treasurer’s Office, ug Management Information and Computer Services (MICS) Office sa pag-reconcile sa mga rekord aron matul-id ang problema.
