CEBU CITY – Andam nga mupasaka ug kaso ang Cebu City government ngadto kang Jason John Tapales alyas “Boy Laway”.
Gibutyag ni Cebu City Councilor Joel Garganera nga ang Cebu City ang nangulo sa maong kapistahan hinungdan nga aduna silay katungod nga mupasaka ug kaso ni bisan kinsa nga nakaguba sa ilahang gipaningkamutan nga kasaulogan.
Matud ni Garganera nga mamahimo usab kini nga sumbanan sa musunod nga Sinulog nga dili na kini subling mahitabo, ingon man nga mahimong pahimangno sa publiko nga ibutang sa limitasyon ang kaugalingon panahon sa kalingawan.
Gikasagmuyo sa konsehal nga gumikan sa gihimo ni Tapales, susama nga nawagtang ang bili sa gihaguan sa dakbayan sa Sugbo nga mahimong malampuson ang Sinulog 2020 gumikan kay natabunan kini sa kontrobersyal ni Boy Laway.
Subay niini, nanghinaut si Garganera nga mahuman na ang maong isyu ug mahimo nga pagtulun-an sa tanan.
Pahimangno usab sa opisyal sa mga Sugbuanon nga i-welcome ang mga langyaw panahon sa Sinulog sa pamaagi nga tinarong ug dili sa paghugaw-hugaw.
