CEBU CITY — Dili na magpahigayun og Christmas Party ang Cebu City Government isip pagsimpatiya sa mga naapektuhan sa nasinating krisis nga dala sa COVID-19 pandemic.
Matud ni Mayor Edgardo Labella nga ihatag na lang ang P5-Million nga budget ngadto sa mga labing naapektuhan sa mga lockdown ug sa pandemya.
Ipalit ang maong pondo og sinakong bugas ug canned goods dayon ipang apod-apod ngadto sa mga naapektuhan sa krisis sama lang sa mga jeepney ug habal-habal drivers, ingon man mga ambulant vendors.
Bisan og dili kini paigo, nisaad si Labella nga mangita og laing paagi nga mapundohan ang maong lakang.
Samtang, gitun-an pa ni Labella kung ihatag pa ba Christmas Bonus sa mga empleyado o i-donate kini ngadto sa mga pamilyang hilabihang naglisud tungod sa pandemya.
Mokabat ngadto sa P10,000 ang Christmas bonus nga ihatag matag empleyado sa City Hall.
Samtang, gitataw ni Labella nga i-release gihapon ang mandatory 13th month pay ngadto sa mga trabahante. (report by Bombo Jun Salde/ekp/gn)
