CEBU CITY-Gikatakdang i-rescue ug i-rehabilitate sa kagamhanang dakbayan sa Sugbo ang mga “rugby boys” nga gikatahong nagpahinabog kasamok sa pipila ka barangay.
Matod pa sa City Office for Substance Abuse Prevention (COSAP) nga gikinahanglan na nga luwason ang mga rugby boys sa kadalanan human kini makadawat og mga reklamo nga ang uban kanila gikatahong nagpahinabog kasamok sa Barangay Capitol Site ug Kamputhaw.
Sa pamahayag ni Jonah John Rodriguez, ang executive director sa COSAP nga nagkanayon nga plano sa kagamhanang dakbayan nga dili lang i-rescue ang mga rugby boys kon dili lakip na ang paghatag og psychosocial intervention alang kanila tungod sa ilang paggamit sa solvents isip illegal nga drugas.
Matod sa opisyal nga sa pakigtagbo niini kang Cebu City Mayor Raymond Alvin Garcia nga nihatag na sa iyang inisyal nga pagtugot sa paghimo og technical working group aron makahimo og guidelines kon unsaon ang rescue operations.
Matud pa nga nga plano usab sa mayor nga moluwat og executive order aron mahatagan og legal nga basehanan ang pagsuporta sa operasyon sa kagamhanang dakbayan.
Ingon man nga nasiguro sa dakbayan ang pasalig sa Charity of the Miraculous Medal (CMM) aron pasilongan ang mga naluwas nga mga bata sa Asilo de la Milagrosa.
Matod ni Rodriguez nga importante ang pasalig sa CMM aron maseguro nga ma-rehabilitate ug dili na mobalik sa kadalanan ang mga na-rescue nga mga bata.
Sa higayon nga mapirmahan na sa mayor ang executive order, mahimo nang sugdan sa Siyudad ang rescue operations sa unang quarter sa 2025.
