CEBU CITY-Gipaniguro ni Cebu City Acting Mayor Raymond Alvin Garcia nga ipakiha ug kasong Kriminal ug Administratiba ang tag-iya sa luna ug riprap nga miresulta sa kamatayon sa 17-anyos nga batang babaye kagahapon sa kadlawon diha sa Don Bosco Proper Punta Princesa ug Sitio Caduloy, Tisa ning dakbayan sa Sugbo.
Kini subay sa nasinating pagbunok sa uwan sa dakbayan sa kasagsagan sa bitad sa Hanging Habagat ug Tropical Depression “Enteng” sa milabay nga adlaw.
Kaganihang alas 9 sa buntag, adlaw sa Lunes September 2, 2024 giduaw ni Acting Mayor Garcia ang pamilya sa biktima nga giilang si Jemima Ibuña, 17-anyos ang panuigon.
Subay sa pagbisita, gidunol sab ang P20k personal nga kwarta sa Acting Mayor ngadto sa pamilyang Ibuña isip pasiunang hinabang.
Nisango ang Acting Mayor kang Cebu City Councilor Joel Garganera, kinsa Chairman sa Committee on Disaster Risk Reduction sa pagpreparar sa mga kaso.
