CEBU CITY-Nabulabog ang tanang empleyado ug kliyente sa Cebu City Hall of Justice human nakadawat og ‘bomb threat’ ang Regional Trial Court Branch 16 sa Qimonda Building nga nahimutang sa North Reclamation Area sa siyudad sa Sugbo, Pebrero 12, 2024.
Matod pa ni Police Lieutenant Colonel Janette Rafter, ang Deputy City Director for operations sa Cebu City Police Office nga nakadawat og ‘forwarded message’ si Police Colonel Ireneo Dalogdog kabahin sa giingong bomba nga anaa sa government agency.
Gani, dali nga gihatagan og pagtagad ang maong hulga diin ang Mabolo Police Station sa pagpangulo ni Major Romeo Caacoy ug sa Explosives and Ordinance Division ang misusi sa maong lugar.
Hinuon, dako ang pasalamat ni Police Corporal Cris Omblero nga atol sa ilang pagsusi sa establisamento, wala silay nakita nga mga bisan unsa nga butang nga makamugna og kadaot sa katawhan nga anaa sa naasoy nga lugar.
Ingon man nga wala ra nagdugay ang ilang inspeksyon ug mibalik na sa ilang tagsa-tagsa ka trabaho ang mga empleyado.
Sa pagkakaron padayon pa ang ilang pag-imbistiga kabahin sa nagpadala sa mensahe arun masiguro nga masilutan ang maong indibidbwal.
