CEBU CITY-Giawhag sa Cebu City legislator ang mga barangay nga pakusgan ang ilang mga paningkamot sa pakigbisog sa pag-abuso sa mga bata sama sa trafficking, online, ug sexual exploitation.
Mao kini ang giduso nga resolusyon ni Cebu City Councilor James Cuenco diin mihangyo sa 80 ka mga barangay sa dakbayan sa Sugbo pinaagi sa Association of Barangay Councils nga i-reconvene ang Barangay Council for the Protection of Children o kon BCPC ubos sa City Ordinance 2163 diin naaprobahan usab atol sa regular session sa City Council, gahapong adlawa.
Nunot kini sa mitumaw nga mga matang sa kalihokan sama niadtong Pebrero 2, usa ka 31-anyos nga inahan nga taga dakbayan sa Sugbo ang nasikop tungod sa giingong pagpamaligya sa iyang 8-anyos nga anak nga babaye pinaagi sa pagtanyag og mga hulagway ug video sa bata ngadto sa langyaw nga mga kustomer online.
Ug laing namatikdan sa dakbayan sa Sugbo nga nakasaksi sa tulo ka higayon sa Online Sexual Exploitation and Abuse of Children nga nahitabo sa Barangay Luz, Suba, ug Tisa sa miaging tuig.
Gikompirmar usab ni Konsehal Cuenco nga nisaka ang kaso sa pag-abuso sa bata, apan wala madakpi tungod sa kakuwang sa koordinasyon sa mga hingtungdang ahensya.
Dugang pa niini nga angayan nga dalion ang giduso nga resolusyon gumikan sa ilang nakuhang taho nga aduna na’y mga organo sa tawo nga gipangbaligya sa mga pasyente sa Chinese nga nagbutang sa kinabuhi sa mga inosenteng bata.
