Gilusad karon sa kagamhanan sa Dakbayan sa Sugbo ang mas gipahugtan nga seguridad ug pakigbisog batok sa mga kriminal human sa sunod-sunod nga insidente sa “rent-tangay scam” ug usa ka kaso sa kidnapping sa barangay Banilad.
Mipasidaan si Cebu City Mayor Nestor Archival ngadto sa mga car rental operators batok sa maong scam, diin ang mga suspek magpaaron-ingnong magrenta og sakyanan apan dili na kini ibalik.
Sa iyang pamahayag niadtong Mayo 28, 2026, gibutyag sa mayor nga aduna nay mga higayon nga ang girentahang mga unit gibaligya gamit ang mga palsipikadong dokumento, hinungdan sa grabeng pagkalugi sa mga negosyo sa siyudad.
Aron mapugngan ang maong modus, nakig-alayon na ang lokal nga kagamhanan sa Highway Patrol Group (HPG-7) ug sa Philippine National Police (PNP) alang sa mas paspas nga pag-monitor ug pag-bawi sa mga gikawat nga sakyanan.
Giawhag ni Archival ang mga operators nga sutaon og maayo ang mga ID sa kustomer, magpataod og GPS trackers sa mga sakyanan, ug higpitan ang pagpangayo og mga dokumento sa dili pa ipagawas ang unit.
Sa laing bahin, nakab-ot sa kapolisan ang kalampusan human ma-recover ang usa ka SUV nga nalambigit sa giingong kidnapping didto sa Barangay Banilad.
Ang maong sakyanan kabahin sa duha ka unit nga gigamit sa maong krimen.
Sa pagkakaron, pormal nang gikasohan ang unom ka mga suspetsado nga giingong nalambigit sa maong pagpanagit.
Gitapos ni Mayor Archival ang iyang mensahe pinaagi sa pag-awhag sa mga Sugboanon nga magpabiling alerto ug magtinabangay aron mapadayon ang kaluwasan, kalinaw, ug kaayohan sa tibuok Dakbayan sa Sugbo.
