CEBU CITY- Gisugyot karon ni Cebu City Mayor Nestor Archival nga nagtumong sa kausaban may kalabotan na sa pagresponde sa mga alarma ug emerhensya.
Pipila sa mga naglangkob sa maong sugyot mao ang pagpahamtang og mga dugang close circuit television cameras sa mga flyovers ug uban pang pampublikong kadalanan.
Kini nga lakang nagsubay sa dili pa dugay nga trahedya sa Archbishop Reyes Avenue ning Dakbayan sa Sugbo, diin usa ka ambulansya ug motorsiklo ang nalambigit sa maduguon nga aksidente, nga miresulta sa pagkamatay ni Braille Nichole Kwek, 18 anyos nga dalagita, ug sa tumang pagka-angol usab sa 19 anyos nga uyab niini, kinsa parehong magtutungha sa usa ka pribadong unibersidad sa Sugbo.
Samtang ang drayber sa ambulansya nga si Kevin Ryan Gesta, 23 anyos, anaa gihapon karon sa kustodiya sa Traffic Enforcement unit samtang gihuwat ang gi-andam nga kaso niini.
Matod pa ni Mayor Archival, gawas sa pagpalambo sa mga teknolohiya sa kadalanan, lakip usab niini ang retraining sa mga responders labi na sa mga drayber sa mga emergency vehicles.
Dugang pa, gisugyot usab sa Mayor nga dili na paagian og mga emergency vehicles ang mga fly overs, aron malikayan ang mga aksidente, ug mas maayo nalang nga paagion sa ubos nga bahin kaysa sa fly over mismo.
Samtang, sa mga sugyot sa mayor, naglakip usab kini sa pagbutang og mga CCTV cameras sa fly overs aron mamonitor ang kutob sa mahitabo sa kadalanan.
