CEBU CITY- Nagplano og practical ug long-term nga mga solusyon si Cebu City Mayor Nestor Archival aron matubag ang padayong problema sa basura sa dakbayan, human sa iyang learning visit sa Japan.
Matud sa alkalde, dako kaayo’g tabang ang iyang nakita ug natun-an atol sa serye sa high-level meetings ug site visits sa Yokohama ug Tokyo, ilabi na sa pagdumala sa basura ug pag-integrate sa sustainability sa urban planning.
Sa Yokohama, nakigpulong ang delegasyon sa lokal nga liderato aron hisgutan ang konsepto sa Regional Circular Cities ug sustainable city frameworks.
Samtang sa Tokyo, gipunting ang mga diskusyon sa pagpalig-on sa partnerships alang sa innovation, environmental protection, ug episyenteng public service systems.
Nagtuon usab ang Cebu City sa waste-to-energy system sa Japan, diin ang basura ginahimo’g kuryente aron makunhod ang landfill ug maprotektahan ang kalikupan.
Ilalom sa Asian Circular Cities Declaration ug kooperasyon sa ICLEI, nagplano ang siyudad nga himuong recoverable resource ang basura, gamiton ang limpyo ug socially accepted nga teknolohiya, ug palig-onon ang community participation.
Tumong sa Cebu City ang mas limpyo nga barangay, episyenteng waste management, ug dugang oportunidad sa sustainable energy alang sa tanan Sugboanon.
