Nagmando si Cebu City Mayor Nestor D. Archival alang sa pagmugna sa Cebu City Task Force Against School Violence ubos sa Executive Order No. 088, Series of 2026 aron panalipdan ang mga eskwelahan ug palig-onon ang seguridad sa mga kampus human sa mga bag-ohay nga insidente sa mga pagpanghulga nga naglambigit sa mga menor de edad.
Ubos sa Executive Order No. 088, Series of 2026, gimugna ni Archival ang usa ka multi-sectoral body nga gitahasan sa pag-coordinate sa mga palisiya, programa, ug mga interbensyon nga nagtumong sa pagsiguro nga ang mga eskwelahan magpabilin nga luwas nga mga lugar alang sa mga estudyante, magtutudlo, ug mga kawani sa eskwelahan.
Kini nga mando nitumaw human sa bag-ohay nga mga insidente sa gun violence nga naglambigit sa mga menor de edad sulod sa mga eskwelahan, nga nagpasiugda sa panginahanglan alang sa usa ka koordinadong lakang aron mapanalipdan ang mga estudyante ug mapugngan ang mga bisan unsang weapons nga makasulod sa mga institusyon sa edukasyon.
Gihimo kini subay sa mga probisyon sa 1987 Constitution, Local Government Code of 1991, Republic Act No. 7610, Republic Act No. 10627, ug Republic Act No. 11036 aron masiguro ang luwas ug malinawon nga palibot sa pagkat-on para sa mga estudyante ug magtutudlo.
Samtang ang mangulo sa maong task force mao si Archival isip chairman ug si Vice Mayor Tomas Osmeña isip vice chairperson, uban sa mga sakop gikan sa Cebu City Council, CCPO, DepEd, CHED, DSWD, PTA Federation, mga opisyal sa barangay ug SK, ug uban pang mga ahensya ug grupo.
Tutokan sa task force ang paghimo og safety risk assessments, standardized emergency response protocols, psychosocial support para sa mga kabataan, ug pagpalig-on sa koordinasyon aron mapugngan ang kapintasan sulod sa mga tulunghaan.
Lakip usab sa mga nag-unang katuyoan sa task force mao ang pagpasiugda sa luwas ug inklusibo nga palibot sa pagkat-on, pagpugong sa kapintasan sa eskwelahan ug pag-abuso sa droga, pagpalig-on sa koordinasyon sa mga hingtungdan, pagpauswag sa pagpangandam sa emerhensya, ug pagpalambo sa kahibalo sa kahimsog sa pangisip sa mga eskwelahan.
