CEBU CITY-Supportado ni Cebu City Mayor Raymond Alvin Garcia ang planong ibalhin sa South Road Properties (SRP) ang tanang buhatan sa Cebu City Hall.
Kini ang gianunsyo sa Mayor niadtong Huwebes, Pebrero 13 diin ang maong plano kay manginahanglan og dili muminos sa P500-milyones nga budget sa tuig 2026.
Gibuhi kini nga ambisyon sa Mayor nga unang gisugyot sa kanhi administrasyong Rama pipila ka tuig nang milabay diin ang pahiunang budget kay muabot lamang sa P300-milyones.
Matod ni Garcia nga sa higayong makapadayon sa posisyon kay himuon kini niyang flagship project ang pagbalhin sa City Hall ngadto sa SRP.
Samtang pabilin ang karaang building sa City Hall sa dalan Magallanes nga i-upcycle kini isip heritage site og mahimong museum.
Ang maong plano kay maghaw-as sa tanan buhatan sa kagamhanan dakbayan ngadto sa SRP lakip na ang nag-okupar sa ABC building ug MCWD building.
Apan sa pikas bahin dali kining gisaway ni Cebu City Councilor Nestor Archival Sr. diin matod pa nga ang maong proyekto kay usik-usik lang sa budget sa katawhan susama sa kapakyas sa pamunuan nga mahuman ang Cebu City Medical Center (CCMC).
