CEBU CITY-Gimandoan ni Cebu City Mayor Michael Rama ang City Administrator nga si Suzzane Ardosa nga tun-an pag-ayo ang angayan nga makadawat ug Mayor’s award karung umaabot nga Mayo 1 o Labor Day.
Matud ni Mayor Rama nga dili lang ang mga naghupot ug dakong posisyon ang angayan nga pasidunggan sa City government, inay lakip na ang mga labing ubos nga posisyon sa gobyerno nga adunay dakong gikatabang sa kahinlo ug kalimpyo sa syudad.
Subay niini, giawhag sa opisyal ang tanang empleyado sa City Hall nga batason ang pagpanglimpyo sa palibot ug likayan ang pagpataka ug labay sa mga basura kansang kalabot sa gihapon sa iyahang programa nga Singapore-like Cebu City.
Gipasalig ni Rama nga ubos sa iyahang administrasyon, walay ni bisan kinsa nga empleyado ang mahabilin ug angayan nga hatagan ang tanan ug patas nga pagtagad.
