CEBU CITY-Gipaabot ni Cebu City Mayor Michael Rama nga mohatag og updates sa Cebu City Medical Center (CCMC) sa iyang paghatag sa iyang ikaduhang State of the City Address (SOCA) karong Hulyo 3, 2023.
Tagaan ug tul-id nga tubag ni Mayor Rama ang kabahin sa update sa katukoran sa 10 ka andana nga CCMC, kansang tulo ka nahibilin sa taas nga andana, gikan sa ikawalo ngadto sa 10th floor, wa pa mahuman,
Kahinumduman, atol sa ika-86 nga Charter Day sa dakbayan niadtong Pebrero 24, gusto sa mayor nga hingpit nang magamit ang CCMC sa Nobiyembre 2023, nga lima ka buwan gikan karon. Wa pa matino kon mosunod ba ang siyudad sa laing timetable o target date sa pagkompleto sa CCMC.
Human ma-terminate ang kontrata ug masulbad ang isyu sa contractor sa Phase 4 contractor sa tambalanan nga M.E. Sicat Construction Inc., ang mayor niingon nga dili na mogasto pa ang siyudad sa pagkompleto sa CCMC kondili magsalig na lang sa public-private partnership solutions. .
Sa pagkakaron, labing minos upat ka mga Filipino nga pribadong kompaniya ug usa ka grupo sa mga negosyanteng Intsik ang nisaad na og mga P1 bilyones nga pundo aron makompleto ang tulo ka nahibiling andana sa CCMC.
Hangtud sa Nobyembre 2022, ang kinatibuk-ang gasto sa pagtukod alang sa bag-ong CCMC building kay P1,909,813,695.79.
Sukad gisugdan ang pagtrabaho sa bag-ong CCMC building niadtong 2015, ang kagamhanan sa dakbayan nisulod og kontrata sa upat ka mga kontraktor: C.E Padilla Construction, Inc., Chariz Construction, C.B. Garay Philwide Builders, ug M.E Sicat Construction Inc., ug matag usa niini. Ang mga kontraktor mihimo og lain-laing mga hugna alang sa bag-ong CCMC building construction.
