CEBU CITY-Nabalaka si Cebu City Mayor Michael Rama sa nahitabong panaglalis tali ni kanhi Presidente Rodrigo Duterte ug ang kasamtangang Presidente Ferdinand Marcos Jr., nga pareho niyang giisip nga higala.
Matud pa niini nga naalarma kini gumikan hilabihan kabug-at ang mga alegasyon nga nanggawas.
Dugang pa niini nga wala niini nakita nga adunay hayag sa tumoy sa tunel tungod sa kabug-at sa mga pulong.
Kahidumduman nga mikaylap karon atol sa prayer rally sa Davao City niadtong Domingo sa gabii, balik-balik nga gitawag ni Rodrigo Duterte si Marcos nga “drug addict” nga wala damha ni Rama.
Agig tubag, si Marcos miingon nga ang mga pangangkon ni Duterte mahimong resulta sa fentanyl, usa ka pain reliever nga giingong dugay nang giinom sa kanhi Presidente.
Ingon man nga bisan pa nga bise Presidente si Rama sa PDP laban sa Visayas, hugot sa gihapon ang iyang suporta sa kasamtangang administrasyon.
