CEBU CITY-Ni-file na usab og leave of absence si Cebu City Mayor Michael Rama hangtod sa Domingo, Oktubre 15, 2023.
Mao kini ang gibutyag ni Cebu City Vice Mayor Raymond Alvin Garcia atol sa flag raising ceremony adlaw nga Lunes, Oktubre 9, 2023.
Si Garcia, kinsa acting mayor hangtod nga nibalik si Rama, wa mobutyag sa mga detalye sa luyo sa pag-file og leave of absence sa Mayor sa dakbayan.
Natod niini nga kung aduna may importanteng butang nga hisgutan, o mga dokumento nga pirmahan, mamahimong mudangop nalang sila sa iyang buhatan bisan kanus-a.
Si Garcia nilihok usab isip mayor niadtong Septiyembre dihang nibyahe si Rama paingon sa Russia aron magtrabaho alang sa sister-city agreement uban sa City of Vladivostok.
Sa pikas bahin, gibutyag usab ni Garcia nga ang Cebu City ginganlan nga most improved and highly urbanized city pinaagi sa Cities and Municipalities Competitive Index, nga gimugna sa National Competitiveness Council pinaagi sa Regional Competitiveness Committees uban sa tabang sa United States Agency for International Development.
