CEBU – Mapasalamaton si Cebu City Mayor Mike Rama sa iyahang nahimong kalampusan human mapiling presidente sa League of the Philippines (LCP).
Nagkanayon si Rama nga dili niya matagsa-tagsa og pasalamat ang tanan apan dako kaayo ang iyahang kalipay sa suporta nga iyahang nadawat.
Lakip sa iyahang gipasalamatan si President Ferdinand “Bongbong” Marcos Jr., Vice-President Sara Duterte-Carpio, ang kasamtangang House speaker, ug ang Senate president, sa ilang suporta sa iyang tinguha alang sa LCP presidency.
Plano ni Rama karon nga dalhon ang tanang mayor dinhi sa dakbayan sa Sugbo nga daan nang apil sa iyahang plataporma lakip usab ang paghatag ug kahulogan sa lokal nga awtonomiya ug pagtrabaho sa mga paningkamot aron ang tanang siyudad sa nasod nga mahimong “smart city” ug “globally competitive” ug uban pa.
Nakuha ni Rama ang boto sa 110 ka mga mayor sa dakbayan gikan sa 146 ka sakop sa LCP sa piniliay niadtong Huwebes, Hulyo 21, sa Manila.
