CEBU CITY-Naneguro si Cebu City Mayor Mike Rama nga mahuman sulod sa duha ka semana ang venue sa Sinulog sa South Road Properties.
Kini pinasikad sa pasalig nga gihatag ni Sinulog Executive Committee Chairman Pericles Ricky Dakay ngadto sa Mayor, kung diin, matod pa nga sulod sa duha ka semana, mahuman na ang civil works sama sa asphalting, concreting, ug ang installation sa grandstand.
Personal nga gisusi sa Mayor ang maong venue niadtong Enero 2, 2024, kung diin iyaha nga gipangayo ang progreso sa konstruksyon sa maong venue.
Dugang niini, iyaha usab nga nasayran nga mamahimo na nga magpahigayon og blocking ug pag-practice ang mga contingents sa maong venue usa ka semana gikan karon.
Subay sa maong balita, ang Sinulog Grand Parade ug Showdown gikatakda karong Enero 21, sa samang venue sa 2023 Sinulog.
Gibutyag usab ni Cebu City Councilor Jerry Guardo nga ang Rama administrasyon, masaligon kaayo sa venue sa SRP alang sa umaabot nga sinulog grand parade 2024.
Matod pa ni Guardo nga adunay kausaban sa rota sa Sinulog diin nga ang Sinulog Carousell adunay bag-ong dalan nga gi-abrihan apan dili angay nga ikabalaka tungod kay ang dalan nga gi-abrihan, aspalto na.
Samtang padayon pa gihapon ang pag aspalto nila sa mga kadalanan og na concreto nasad ang atubangan sa maong entablado alang sa mga contingents.
