CEBU CITY- Gitakda ni Cebu City Mayor Nestor Archival ang buwan sa Disyembre 2025 nga tagal sa paghuman sa dugay nang nalangan nga taytayan sa Pulangbato, nga wala pa mahuman dul-an sa upat ka tuig human kini naguba.
Gipahibalo kini ni Archival human gisusi ang reinforced deck girder bridge sa Sityo Candarong atol sa pagbisita sa mga nag-ung-ong nga mga proyekto sa imprastraktura sa mga bukirang barangay sa ting-ulan nga Domingo sa buntag, Hulyo 13.
Ang taytayan usa ka kritikal nga lifeline nga nagdugtong sa Pulangbato sa mga nag-unang lugar sama sa Pit-os ug Talamban ug nagserbisyo sa mga kabukiran sama sa Guba, Agsungot, Lusaran ug Sirao.
Tungod sa wala pagkahuman niini, napugos ang mga residente ug motorista sa paggamit sa mga improvised nga rota, apil na ang makeshift bamboo footbridge nga gihulagway ni Archival nga delikado, ilabina panahon sa kusog nga ulan.
Matud pa ni Archival, Ang bag-ohay nga pagkamatay sa usa ka hiker sa usa ka lahi nga insidente sa usa ka talon sa Barangay Budlaan nagpasiugda sa dinalian nga panginahanglan alang sa kasaligan nga agianan nga nahimutang sa mga bukirong lugar sa syudad.
Nagsugod ang problema sa proyekto sa dihang naguba ang karaang istruktura sa asero atol sa pag-atake sa super typhoon Odette niadtong Disyembre 2021.
Gisugdan ang maong proyekto niadtong Sept. 15, 2023 sa SBD Builders Inc. Apan, ang proyekto nalangan sa pagkonstruksyon, nga matud ni Archival nga ang kontraktor adunay pagkulang sa mga kagamitan ug bug-at nga makinarya.
Atol sa pagbisita ni Cebu City Mayor Nestor Archival, si Pulangbato Barangay Kapitan Barry Miñoza nipahibawo kang Archival nga adunay bag-ong kontraktor ang midaog sa proseso sa rebidding apan wala pa makakuha og notice to proceed, usa ka lakang nga giingon ni Archival nga gikinahanglan sa dili pa makabalik ang trabaho. Mibahad ang mayor nga bantayan pag-ayo sa iyang administrasyon ang bag-ong kontraktor aron malikayan ang dugang nga pagkalangay.
Gitataw ni Archival ang iyang pasalig nga mahuman ang proyekto alang sa mga residente nga nagsalig niini. | Bombo Nathaniel Sandoval
