Gipahibalo ni Cebu City Mayor Nestor Archival nga mogamit ang tanang 80 ka barangay sa Dakbayan sa Sugbo sa ilang Local Development Fund (LDF) nga mobalor og ₱8 milyones matag usa, partikular na alang sa pagpalit og mga shredding machine aron matabangan ang pagpakunhod sa gidaghanon sa basura sa siyudad.
Subay sa gipasabot ni Mayor Archival nga ang maong ₱8 milyones kabahin sa LDF nga kasamtangang gigunitan sa kagamhanan sa dakbayan, diin ang pagpagawas niini nagsubay sa pipila ka kriterya sama sa environmental protection initiatives.
Diin sa maong pundo, labing menos ₱2.5 milyones ang gamiton ubos sa usa ka emergency program alang sa pagpakunhod sa basura.
Gikatakda usab karong adlawa, Pebrero 3, nga ipresentar ni Konsehal Dave Tumulak sa Konseho sa Dakbayan ang plano nga nagpasiugda sa kamahinungdanon sa pagpalit sa maong mga kagamitan, kay kahinomdoman nga gipahibalo ni Archival sa usa ka press briefing niadtong Pebrero 2 nga magpahigayon og emergency meeting ang dakbayan pinaagi sa DILG kauban ang mga opisyal sa barangay aron mohatag og klarong direksyon sa maong plano.
Sa higayon nga makasabot na ang mga kapitan ug makaila na og dapit alang sa shredding operations, gipaabot nga mokunhod ang gasto sa dakbayan alang sa hauling ug tipping fees sa mga landfill, kay gawas sa pagdaginot, makatabang usab ang maong inisyatiba sa composting sanglit tinguha sa mayor nga munaog ang gidaghanon sa basura nga dad-on sa landfill.
Pinaagi niini, mamonitor sa dakbayan kon epektibo ba ang barangay sa pagpakunhod sa ilang basura.
