CEBU CITY-Gisiguro ni Cebu City Mayor Michael Rama nga adunay lakang pagahimuon ang lokal nga kagamhanan sa dakbayan sa Sugbo may kalabotan na sa pagpositibo sa Human Immunodeficiency Virus (HIV) sa pipila ka mga piniriso sa Cebu City Jail.
Gibutyag sa mayor nga sa Bombo Radyo Cebu lang kini nasayod sa maong seryoso nga problema hinungdan mandoan niini ang Cebu City Health Department sa pagbisita sa pasilidad ug susihon ang maong sitwasyon.
Matud pa, aduna may kaugalingong mga doctor ug nurse ang maong pasilidad, apan iyaha sa gihapon kini nga ipabisita ni Dr. Daisy Villa, ang pangulo sa City Health ug mga kaubanan niini.
Hinuon, gitino ni Mayor Rama nga wala may hurisdiksyon ang City government sa maong pasilidad gumikan kay ubos man kini sa Bureau of Jail Management and Penology (BJMP), apan giingong aduna may Police Coordinating Advisory Council (PCAC) ang syudad diin nasakop niini ang BJMP hinungdan nga dili angayan nga pasagdan ang naasoy nga problema sa City Jail.
Kahinumdoman nga gikumpirmar ni Cebu City Jail Officer 3 Blanche Aliño, ang jail information officer, nga adunay kapin 10 ka mga piniriso ang nagpositibo sa HIV
Nasayran nga adunay 6,100 ka mga piniriso sulod sa Cebu City Jail Male Dormitory.
