CEBU CITY-Mipasalig si Cebu City Mayor Tomas Osmeña kang Ormoc City Mayor Richard “Goma” Gomez nga mutabang ang dakbayan sa Sugbo sa mga naapektahan sa linog sa Leyte.
Matud ni Alvin Dizon ang consultant ni Mayor Osmeña nga sa iyang pagbisita kagahapon sa opisina ni Mayor Gomez sa Ormoc City, giingong nagka-istorya ang duha ka Mayor sa telepono ug didto misaad si Mayor Osmeña nga muhatag og tabang.
Matud usab ni Dizon nga nakahinabi usab niya ang mga kadagkuan sa Ormoc City Disaster Risk Reduction Management Council ug nakuha mismo niya ang mga datos sa ilang damage assessment ug ang mga tabang nga gikinahanglan niini.
Sigon pa ni Dizon nga ang report nga iyang i-sumiter basi na usab sa iyang gipahigayon nga inspeksyon ang maoy himoong basehan ni Mayor Osmena kung unsa nga tabang ang ihatag sa dakbayan sa Sugbo sa Ormoc ug Kananga nga maoy grabe nga nadaot sa linog nga mitumaw niadtong miaging Huwebes.
Dugang pa usab ni Dizon nga sa iyang pagbisita sa Ormoc nakita niya nga adunay mga barangay nga dili na pwede nga mapuy-an sa Mines and Geo Sciences Bureau o MGB tungod kay dili na kini luwas.
