Nangandam na ang kagamhanan sa Dakbayan sa Sugbo sugod pa niadtong Enero human nagpagawas og pasidaan ang PAGASA bahin sa hulga sa El Niño.
Gikumpirmar ni Cebu City Agriculturist Joey Baclayon sa usa ka media forum niadtong Martes, Hunyo 16, 2026, nga duna dayon silay gihimo nga mga barangay caravan ug information campaign alang sa mga mag-uuma.
Matod ni Quiblat, ang hepe sa PAGASA-Mactan Weather Bureau, dako ang kahigayonan nga mosaka pa sa 80% ang tsansa nga hingpit nga moigo ang El Niño sa dili pa matapos ang tuig tungod sa padayong pagsaka sa temperatura sa kadagatan sa tropical Pacific.
Basi sa mga weather model, posibleng mahimong kasarangan ngadto sa kusog ang hulaw tali sa Septiyembre ug Nobiyembre, samtang duna say 30% nga tsansa nga mahimo kining grabe ka kusog ug molungtad pa hangtod sa sayong bahin sa sunod tuig.
Bisan og wala pay natalang grabeng pagkaguba sa tibuok dakbayan, ang inisyal nga pagsusi nagpakita nga anaa na sa 663 ka mga mag-uuma sa 19 ka bukirang barangay ang nagsugod na sa pagbati sa epekto niini diin ang City Agriculture Department nakatala og 13% nga average nga kadaot sa mga pananom.
Grabe ang nahiaguman sa pipila ka dapit diin natala ang
Budlaan: 51.91 percent crop damage
Tagbao: 45.59 percent crop damage
Tabunan: 42.69 percent crop damage
Agsungot: 42 percent crop damage
Samtang padayon pa nga gisusi ang uban pang bukirang mga barangay sama sa Adlaon, Lusaran, Sirao, Sudlon 2, Sapangdaku, Buhisan, Binaliw, Busay, ug Toong alang sa kinatibuk-ang 13,167 ka rehistradong mag-uuma sa dakbayan.
Aron masumpo ang epekto sa hulaw, gi-aprobahan sa dakbayan ang P30 milyones ubos sa Supplemental Budget 1 nga i-diretso sa mga proyekto sa tubig ug agrikultura sama sa pag-ayo sa mga karaan nga irigasyon, pagtukod og bag-ong pasilidad sa tubig, ug pagpabarog og mga solar-powered water pumps.
Nangandam usab ang kagamhanan sa paghatag og P5,000 nga cash assistance para sa matag mag-uuma nga naapektuhan, pagpatukod og tulo ka dagkong greenhouse units aron makadaginot sa tubig, ug nakigtambayayong na sa Metro Cebu Water District alang sa pagdala og mga mobile water-filtering tank kung mosamot pa ang kanihit sa mainom nga tubig sa kabukiran.
