CEBU CITY — Misanong si Cebu City Mayor Edgardo Labella sa nahimong rekomendasyon sa National Inter-agency Task Force (IATF) nga magpabilin ang dakbayan sa enhanced community quarantine (ECQ).
Kini human nga nipagawas na og resolusyon ang National IATF nga nagtugot sa ECQ extension sa Cebu City ug Mandaue City hangtud sa Mayo 31.
Una niini, napirmahan ni Labella ang Executive Order No. 77 diin adunay mga patakaran ubos sa Modified Enhanced Community Quarantine (MECQ).
Isip pagsunod, gi-revoke ni Labella ang maong kamanduan ug niisyu og laing executive order ang mayor diin gibalik ang lungsod sa ECQ.
Matud ni Labella nga gikalipay niini ang rekomendasyon sa IATF aron ipadayon ang ilang strategic rapid testing ug contact tracing sa mga natakdan sa COVID-19.
Kahinumdumang ni-apelar si Labella ug Mandaue City Mayor Jonas Cortes sa IATF og ECQ extension tungod sa nagkasakang kaso sa COVID-19.
