Gisugdan na ang mga duwa sa Cebu City Olympics karong adlawa nga gipahigayon sa Cebu City Sports Complex.
Gipakita sa mga atleta gikan sa mga nagkandaiyang tunghaan ang ilang dedikasyon ug kahanas sa lain-lain na usab nga paugnat sa kusog.
Nasayran nga mokabat usab sa kapin 50 ka mga tunghaan ang nakibisog sa maong kalihokan, ingon man nga mas nahimong espesyal ang kompetisyon karong tuiga gumikan sa 15 ka tunghaan gikan sa Special Education.
Usa sa mga contingents ang Zapatera School diin gipaambit sa mga estudyante nga adunay intellectual disorders for athletics, hearing impairment for swimming ug uban pa.
Sa pakighinabi sa Bombo Newsteam kang Jonadeth Relampago, ang Coach sa Zapatera School for Special Education diin gihimug-atan niini ang kamahinungdanon sa pagsalmot sa mga bata sa Olympics aron mahasa ang ilang social ability, intelektwal ug ilang disiplina.
Gidugang usab niini nga dili sayon ang pag-train sa mga special student gumikan kinahanglan nga aduna kay taas nga pasensya ron hingpit nga maandam ang ilang emosyon atol sa duwa.
