CEBU CITY-Adunay dugang 80 ka mga security personnel nga gipakatap sa Cebu City Police Office sa 20 ka billeting areas alang sa Palarong Pambansa 2024 karong umaabot nga Hulyo 9, 2024.
Kini ang gipahibalo ni Police Lieutenant Colonel Janette Rafter, ang deputy director for operations sa Cebu City Police Office, kini gumikan kay gilauman nga moabut sa lungsod ang dul-an sa 15,000 nga mga bisita saulahing bahin ning semana.
Subay niini, nag-anam-anam na og kaabot ang mga delegado sa Sugbo alang sa pagsalmot sa Palarong Pambansa 2024.
Hinungdan nga adunay kinatibuk-ang 80 ka personnel gikan sa Regional Mobile Force Battalion sa Central Visayas (RMFB-7) ang gipakatap sa 20 ka billeting areas sukad niadtong Biyernes, Hunyo 28 arun sa pagsiguro sa seguridad ug kaluwasan sa mga delegado.
Gawas niana, gihangyo ni Rafter ang publiko nga sabton usab ang posibleng kahuot sa trapiko sa pipila ka mga dapit atol sa pag-abli sa Palarong Pambansa 2024.
Gumikan gilauman nila nga mohuot ang dagan sa trapiko ug ang pag-usab sa dalan alang sa national sports event nga tambongan sa kapin 15,000 ka mga indibidwal sunod semana.
Hinungdan nga nangayo siya og konsiderasyon sa publiko ug ipakita sa siyudad ang kaanindot ug kabilin niini ngadto sa umaabot nga mga bisita.
Gidasig usab sa kapolisan sa dakbayan sa Sugbo ang posibleng mga manan-aw sa paglikay og pagdala og dagkong mga backpack arun malikayan ang kahasol atol sa frisking sa entrance sa venue.
