CEBU CITY-Gisiguro sa Cebu City Police Office nga hugot nila nga bantayan ang mga residential areas partikular na ang mga boarding house, arun nga malikayan ang pagpangawat samtang wala ang mga tig-balay.
Gipahibalo ni CCPO Director Police Colonel Ireneo Dalogdog nga gimandoan na niini ang tanang mga station commanders sa hugot nga pag-monitor sa tanang mga residential areas gumikan sa long holiday sugod sa Abril 6 ngadto na sa Abril 10, 2023.
Matud pa, gimandoan usab niini ang tanang mga police personnel nga bisitahon ang mga pantalan ug terminal sa dakbayan sa Sugbo subay sa pagsugod sa Oplan Summer Vacation o Oplan Sumvac.
Lakip sa bantayan sa kapulisan ang mga bangko, money changers, pawnshop ug mga dagkong commercial establishments gumikan kay usa kini sa target sa mga kriminal, ingon man ang mga simbahan ug uban pang mga lugar nga bisitahon sa mga turista.
Gidugang ni Dalogdog nga nakig-alayon na usab sila sa mga barangay officials arun sa pagpahigayon ug patrolya sa mga Automated Teller Machines (ATMs) kung diin mag-linya ang mga tawo sa pag-withdraw ug cash gumikan kay dili pa-igo ang personnel sa CCPO arun nga mahimo ang tanang trabaho.
