CEBU CITY- Nagpahigayon og Visually Impaired Chess Tournament ang Cebu City Public Library subay sa pagsaulog sa ika-47 nga National Disability Rights Week.
Ang torneyo kay nag-ulohang “The Invisible Move: Visually Impaired Chess Masters Beyond Limits” nga nagmugna og mas inklusibo, accessible, ug empowering nga environment para sa mga buta (blind) nga maoy unod sa pamulong sa pag-abi-abi ni OIC City Librarian Iris Wenceslao.
Ingon man, matod sab ni Leoniver Gaquing, ang Braille Section in-charge sa City Library nga ang duwa nga Chess kay usa ka visual ug analytical game maong si bisan kinsa nga wala’y panan-aw kay dili mawalaan sa kapasidad nga maghuna-huna ug mu-analisar sa dagan sa duwa.
Naghinaot pa gani kini nga adunay Sugbuanon nga malakip sa PH Para Chess Team nga makarepresentar sa nasud ug sa dakbayan sa dagkong torneyo sa kalibutan.
Ang kalihukan kay nagsilbing imbitasyon para sa visually impaired community nga ganahan makat-on ug muduwa sa chess.
