CEBU CITY-Magsugod karong adlaw sa Lunes, Hunyo 3, 2024 ang summer sports training program sa Cebu City Sports Commission (CCSC) human kini nahunong sulod sa pipila ka tuig.
Kining komprehensibo nga grassroots training program nga gidayeg sa Philippine Sports Commission (PSC) mahitabo sa nagkadaiyang clusters sa tibuok dakbayan sa Sugbo.
Mipahayag si CCSC executive director nga si Gayle Grace Dico nga kinahanglan nilang buhion ang programa tungod sa pipila ka rason.
Matud pa ni Dico nga kini usa ka agianan alang kanamo sa pagbansay, paghanas sa daghang maayong mga atleta ug pagdugang sa mga punoan sa pagbansay ug makatabang kini sa CCSC ug sa DepEd alang niining mga produkto sa summer grassroots nga maka-enrol sa School for Sports Program ug makapadayon sa ilang pagbansay-bansay.
Ang mga gidalit nga mga porgrama kay sa mga isports nga basketball, arnis, taekwondo, gymnastics, athletics, scrabble, chess, karatedo, wushu, dancesport, boxing, badminton, sepak takraw, touch rugby, ug volleyball ang itanyag nga libre sulod sa 10 ka clusters.
Kini nga mga cluster nahimutang sa lain-laing mga barangay sa tibuok siyudad, samtang ang ubang mga dapit naglakip sa Cebu City Sports Insitute sa Barangay Sawang Calero ug sa Barangay Carreta gymnasium alang sa mga espesyal nga sports.
Ang programa bukas alang niadtong nag-edad og unom ngadto sa 18 anyos.
Moluntad ang CCSC summer grassroots sports training program hangtod sa Hunyo 27, samtang ang culminating activity karong Hunyo 28.
