Nausab na ang desiyon ni Cebu City Mayor-elct Nestor Archival kabahin sa Zoning Ordinance sa Dakbayan sa Sugbo, diin sa pagkakaron, nanawagan nga i-defer una ang pag-aprobar sa maong ordianansa.
Ang maong lakang gibuhat sa Mayor-elect human adunay niluwat nga mga akosasyon sa mga vendor nga ni-ingun nga gibudhian sila subay sa pagpa-implementar sa maong ordinansa.
Sa tumong sa paghatag og katin-awan, gikab-ot sa Bombo Radyo Cebu team ang bahin ni Maria Pino, ang Chairman sa Cebu City United Vendors Association, iyahang gikabutyag nga klaro ra sa ilahang asosasyon ang kalambuan sa Sugbo, apan, aduna silay kahadlok bahin sa classification sa yuta, gumikan kay gikan kini sa instirutional ug kalit nahimong commercial.
Sa baruganan ni Pino, nalipay sila sa mga lagda nga buot ipatuman, apan ang ilaha lamang nga gikasakit mao ang paglimod ug sa wala paglakip nila atol sa konsultasyon sa maog ordinansa.
Subay niya, niadtong Martes, Hunyo 24, nipahigayon sila og usa ka press-conference sa Freedom Park, apan, pulong niya, gi-abog sila sa hinungdan nga usa na kini ka private nga luna. Busa, gikinahanglan pa nila nga mangayo og pirmeso sa Megawide.
Gihatagan usab og katin-awan ni Pino og nganung wala mo-uyon ang ilahang asosasyon sa maong Zoning Ordinance sa Cebu City Council, kay tataw, dugay na nga adunay gipahigayon nga konsultasyon apan wala gayud kini niabot sa ilahang bahin. Nahibaw-an lamang nila kini sa dihang nasibya na nga adunay gipahigayon nga hearing maykalabutan sa zoning ordinance, busa, gusto lamang nila nga mag-baton og katin-awan kay adunay dako nga epekto kini sa mga manindahay nga nanginabuhian.
Sa katapusan, ingun ni Pino nga wala sila nibabag, apan gusto lang nila nga dili sila budhian. | Bombo Irene Ardiente
