Gialmahan ni Cebu City Vice-Mayor Tomas “Tommy” Osmeña ang anomalosong overpriced electric SUV nga napalit sa kagamhanang dakbayan sa Sugbo ubos sa kanhi administrasyon ni Former Cebu City Mayor Raymond Alvin Garcia.
Kini nga pamahayag ang gibutyag ni Osmeña pinaagi sa post niini sa iyang social media account nga tataw pa usa ka “vulgar” ug “irregular” nga pagpalit sa kagamhanang dakbayan sa maong luxury electric SUV.
Sa pakighinabi niini sa mga sakop sa tigbalita niadtong Huwebes, Hulyo 3 kay gidetalye niini ang pagpalit sa “BYD Tang” electric SUV nga nagbalor sa P4.4-milyones kansang ang regular pricing para sa mga private buyers kay anaa lang sa P3.3-milyones subay sa website sa maong car brand.
Ang maong sakyanan kay adunay department logo gikan sa Cebu City Office of the Building Official (OBO) base sa mga hulagway nga gipost ni Osmeña kabahin sa maong isyu.
Gisaysay niini nga mao diay nga “hesitant” sa mga turnover documents si Garcia ngadto kang Mayor Nestor Archival tungod sa anomalosong transaksyon.
Gani sa pikas bahin kay daling gihimakak ni Garcia atol sa eksklusibong pakighinabi a Bombo Radyo Cebu Newsteam ang pasangil sa overpriced luxury electric SUV nga matod pa walay budget sa City Hall ang gigasto niini kay giuli dayon kini sa dealer human sa usa ka semanang free trial nga gigamit lang sa OBO ug gikumpirmar sab kini ni OBO Chief Architect Florante Catalan.
