Nagpahimangno si Cebu City Vice Mayor Tomas “Tommy” Osmeña kabahin sa plano sa paglabay sa basura sa layong mga dapit sa probinsya, dungan sa pasidaan nga dako kini og kadaut sa panudlanan sa dakbayan.
Gipahayag ni Osmeña nga kon gamiton ang mga sanitary landfill sa Aloguinsan, Bogo City, o uban pang lagyong dapit isip sunod nga dump site sa dakbayan, mosaka pag-ayo ang gasto sa paghakot ug transportasyon sa basura.
Matod niya, kining maong dugang gasto mahimong makaapekto sa budget alang sa mga importanteng programa ug serbisyo, sama sa city scholarships ug sa operasyon sa Cebu City Medical Center (CCMC).
Atol sa iyang ekslusibong pakighinabi sa mga sakop sa tigbalita, iyang gikabutyag nga usa sa mga problema mao nga giilang “expensive” ang paghatud og mga basura ngadto sa laing dapit.
Gani, nahisgutan pa sa Bise Mayor ang mga langyaw nga mga nasud sama sa Paris, France, Taipei Taiwan nga adunay mga incinerators.
Iya usab nga gikabutyag nga unta, mamahimo ra nga anha sa South Road Properties ipahumutang sa gamayng ektarya sa yuta nga labayan sa mga basura kung ugaling mogamit lang og incinerators.
Kini nga pamahayag sa bise mayor migawas taliwala sa mga negosasyon nga gihimo ni Mayor Nestor Archival sa nagkadaiyang local government units (LGUs), lakip na ang Minglanilla, human gisirad-an ang landfill sa Binaliw.
Gihatagan og gibug-aton ni Osmeña nga kinahanglan mangita ang Cebu City og “innovative” ug malungtarong solusyon alang sa solid waste management.
Gitumbok usab niya nga ang mga proseso sa gobyerno ug procurement usahay maoy makapabalda sa serbisyo, dungan sa pagpahinumdom nga sa iyang panahon isip mayor, iyang gipatuman ang truck-leasing program aron masulbad ang problema sa basura.
