PROVINCE OF CEBU- Giaprobahan na ni Cebu Provincial Governor Pamela “Pam” Baricuatro ang pagpagawas sa pundo alang sa pagpabaskog sa operasyon sa mga provincial ug district hospitals sa lalawigan nga nagbalor og P180.74-milyones.
Kini nga kamanduan sa gobernadora kay gipirmahan niadtong adlawng Lunes, Hulyo 1 nga epektibo alang sa buwan sa Hulyo ug Agosto ning kasamtangang tuig.
Kung diin ipaagi ang pundo sa Maintenance and Other Operating Expenses (MOOE) alang sa upat ka mga provincial hospitals ug 12 ka district hospitals sa tibuok probinsya.
Ang maong alokasyon sa pundo sa Kapitolyo kay nagtinguha sa hinadaling panginahanglan sa tambal ug mga medical supplies sa mga tambalanan nga gidumala sa lalawigan aron masigurong makadalit kini og serbisyo sa matag Sugbuanon.
Nahisubay kini sa pasaad ni Baricuatro sa people-centered governance sa pagsalig nga mahimong dekalidad ang healthcare sa probinsya.
