Mimando si Cebu Provincial Governor Pamela “Pam” Baricuatro sa pagpang-hire sa 78 ka mga doktor nga ipangdestino sa mga provincial ug district hospitals sa lalawigan.
Kini isip kabahin sa inisyatiba sa gobernadora sa pagpalambo sa serbisyong medikal nga idalit sa mga Sugbuanon ilabi na sa mga lagyo sa dakbayan.
Gani sumala niadtong nakalabayng semana, ang kagamhanang lalawigan kay nakadawat na og aplikasyon sa ihap nga 1,858 ug padayon pang nagkadaghan.
Giangkon sa Kapitolyo nga wala nila damha ang gidaghanon sa mga medical professional nga muserbisyo sa lalawigan tungod kay sukwahi kini sa pangangkon sa nakalabayng administrasyon nga wala hatagi og pagtagad ang serbisyong panglawas.
Apan, gisiguro niini nga ang kasamtangang administrasyon ngadto sa publiko nga ilang ipabaskog ang healthcare system sa lalawigan nga maoy top priority sa gobernadora.
Dugang pa nga gawas sa mga doktor kay ang Kapitolyo mupuno sab og uban pang mga healthcare workforce sama sa mga nurses, medical technologists, ug uban pang essential personnel aron sa tinguhang dekalidad nga serbisyo sa mga tambalanang gidumala sa Kapiyolyo.
