Nagkaguliyang niadtong miaging adlaw ang Dakbayan sa Talisay, particular na sa Talisay City Hall, human sa usa ka bomb threat message nga mensaheng nadawat ni Talisay City Mayor Samsam Gullas gikan ni “Mary Ann Pitogo.”
Gani, gipapauli sa tagsa-tagsa nila ka panimalay ang mga empleyado sa Talisay City Hall sa susamang adlaw, subay sa Bomb Threat nga giingong anaa sa sa 3 ka building sulod sa compound.
Hinungdan nga diha-diha dayong nakig-coordinate ang lokal nga panggamhanan sa Talisay City Police Station ug SWAT team aron masiguro ang kaluwasan sa tanan ug mapahigayon ang komprehensibong inspeksyon sa maong lugar.
Apan, sa pakigsusi ug pagresonde sa mga sakop sa Explosived Ordnance Disposal (EOD), pakyas kining nakakaplag og bomba, ug ingun man human sa usa ka operasyon sa K9 paneling nga gihimo sa mga awtoridad. walay nakit-ang eksplosibo usab.
Subay niini, gipasalig ni Cebu Governor Pamela Baricuatro sa publiko ang mas hugot nga seguridad ug walay aktibong hulga sa dili pa ang ASEAN Summit, kini human sa bomb threat sa Dakbayan sa Talisay niadtong Martes, Abril 28, 2026.
Gitino usab sa gobernadora nga daghan na ang military forces sa Sugbo karon, diin gibana-banang moabot kini sa 20,000 busa, hugot kini mipahimangno nga dili mobuhat sa bisan unsang butang nga maghatag og peligro.
Samtang, gitino usab nga bisan pa nga posibleng peke ang account nga nagpadala sa mensahe, apan nag-ingun ang mga otoridad nga dili angay ibaliwala ang bisan unsang hulga nga mahimong magbutang sa kinabuhi sa peligro.
Ingun man nga gipahinumdoman usab ang publiko nga ang pagpakatap og peke nga bomb threat o “bomb joke” usa ka seryosong kalapsan ubos sa Presidential Decree No. 1727, nga mahimong mosangpot sa pagkabilanggo, o multa.
