CEBU CITY-Gisubli ni Cebu Governor Gwendolyn Garcia nga gipanag-iya sa Probinsiya sa Sugbo ang Osmeña Boulevard ug ang palibot niini gikan sa Cebu Capitol Building ngadto sa Fuente Osmeña Rotunda.
Kini human gikuwestiyon ni kanhi Cebu City Mayor Tomas “Tommy” Osmeña niadtong Martes, Marso 5, ang pagpanag-iya sa Cebu Provincial Government sa lote sa Osmeña Boulevard diin gipatuman ang Cebu Bus Rapid Transit (CBRT) project.
Nitumaw ang kasungian tungod sa pagsupak sa Kagamhanan sa Probinsiya sa Sugbo sa katukoran sa CBRT subay sa Osmeña Boulevard.
Matud ni Garcia nga ang ilang pagpanag-iya sa Osmeña Boulevard resulta sa land swap deal tali sa Cebu Provincial Government ug Cebu Heights Inc. nga nagsugod niadtong ulahing bahin sa 1930s.
Dugang pa, nga ang subject sa deal mao ang mga propyedad sa Probinsya sa Barangay Banilad ug ang mga lote sa Osmeña Boulevard ubos sa pagpanag-iya sa Cebu Heights Inc.
Apan, ang kasabutan nag-atubang og mga kontrobersiya, diin si Garcia niingon nga ang kanhi gobernador nga si Sergio Osmeña Jr niadtong higayona mao usab ang presidente ug principal stockholder sa Cebu Heights Inc.
Hinungdan nga tungod sa mga kontrobersiya, ang mga kabtangan gibalik sa ilang tagsa-tagsa ka mga tag-iya
Dugang pa, nga ang nahabilin mao ang right-of-way sa dalan, nga nagpadayon hangtod karon.
