CEBU – Gisuspenso ni Cebu Governor Gwendolyn Garcia ang planong pagpaaspalto sa 100 metros sa wala matapos nga junction road sa may UN Avenue sa dakbayan sa Mandaue.
Hangtud dili magkasabot ang Department of Public Works and Highways (DPWH) ug kontraktor nga BM Marketing, di kini nila himuon.
Gipahibaw niini nga suspensuhon una ang kasabutan sa Kapitolyo tali sa DPWH nga aspaltuhon ang naasoy nga dalan.
Atol sa tigum niadtong Nobiyembre 14, 2022 nga gitambungan sa BM Marketing ug DPWH, gipadayag ni Garcia nga gusto niyang mosud og compromise agreement o sabot ang duha ka habig gumikan moabot og tulo na ka tuig ang kasungian labot sa proyekto sa UN Avenue habig sa Marcelo Fernan Bridge.
Sa milabayng mga taho, gihatagan og remedyo ni Garcia ang wala matapos nga trabaho sa nahisgutang lugar sanglit nakita niini nga nakahasol kini sa mga motorista ug turista nga gikan sa Mactan Cebu International Airport (MCIA) nga mopadulong sa Sugbo ug ubang bahin sa probinsiya sa Sugbo.
