PROVINCE OF CEBU- Giawhag ni Cebu Governor Pamela Baricuatro ang mga Sugboanon nga dili magpakatap og mga fake news kabahin sa mga hinabang nga nakahatag og kalibog sa mga taga Norte nga hilabihang naapektuhan sa kusog nga linog.
Matud niini nga ang kagamhanan sa Probinsya sa Sugbo uban ang nagkandaiyang mga local government units diin gipaningkamutan nga mahatagan ang tanan, busa nihangyo kini sa mga tawo nga wala’y lingaw ug gipili nga magsamok-samok ug libugon ang mga biktima nga maoy nakaingon nga mabulabog gayud ang operasyon sa gobyerno.
Ingon man nga kusganong niapelar nga dili na magpakatap og sayop nga impormasyon inay motutok sa pagtabang alang sa paspas nga recovery sa 4th district.
Gipaambit usab niini ang mga pagpadala sa mga water tanker truck sa nagkandaiyang barangay sa Norte, kini gawas sa mga pagkaon nga madawat sa mga biktima sa 6.9 magnitude nga linog.
Subay niini, nipadayag usab og kinasing-kasing ang opisyal sa tanang nigahin og oras, tabang ug niuban sa hagit nga gisagubang karon sa mga taga Norte.
Diin imposible ang dali ug paspas nga operasyon kung wala ang panag-igsuonay ug pagkahiusa sa mga Sugboanon, ingon man ang mga nikanaog gikan pa sa mga silingang rehiyon.
