CEBU CITY – Dili makatuo ang “Cebuano Hotshot” ug karun Cebu City Councilor sa pagkamatay ni Kobe Bryant.
Sa eksklusibo nga pakighinabi sa Bombo Radyo Cebu kang Dondon Hontiveros, matud pa nga dili maayo ang iyahang adlaw sa dihang nasayra ang alang kaniya usa ka hilabihan ka makaguol nga balita.
Gibalik-lantaw ni Hontiveros ang ilahang one-on-one sa giila nga Black Mamba niadtong NBA lockout nga gipahigayon dinhi sa Pilipinas.
Matud pa nga usa ka maayo nga basketball player si Bryant ug giingong garbo niini nga nakaduwa sa basketball court ang iyahang idolo.
Dugang pa sa Ex-PBA player nga hilabihan ka mapahi-ubsanon nga tawo si Kobe ug walay arte.
Walay kabutangan ang iyahang kalipay sa dihang nakadawat sa Jersey #24 diin mismong si Kobe ang naghatag kaniya, ingon man ang iyahang drayber nga nakakuha sa sapatos niini.
Gituohan ni Hontiveros nga usa ka dakong kapildihan sa natad sa basketball ang pagkamatay ni Bryant kinsang una nang miretiro niadtong 2016.
Nagkanayon kini nga usa ka ‘alamat’ si Kobe Bryant sa tanang mga basketball players ug usa ka dakong inspirasyon alang sa mga gustong musulod sa natad sa basketball.
