Niduyog ang Cebu Metropolitan Cathedral sa panawagan sa Catholic Bishops’ Conference of the Philippines (CBCP) nga ipadayon ug suportahan ang “White Ribbon” movement, human kini nakapahimulos og kalampusan sa unang mga protesta batok sa korapsyon niadtong Setyembre 21.
Sa Circular No. 25-14, si CBCP president ug Kalookan Bishop Pablo Virgilio Cardinal David mihatag og mando sa mga simbahan nga mag-obserbar sa National Call to Prayer and Public Repentance.
Giduso usab sa CBCP nga ang mga Katoliko magsul-ob og puti matag Domingo sa bulan sa Oktubre hangtud sa Nobyembre, ug magbutang og white ribbons sa ilang mga balay, simbahan, ug pampublikong lugar.
Subay niini, nagpakita og pagkahiusa ang Cebu Metropolitan aron ipaabot nga supak usab sila sa grabe nga korapsyon sa nasud.
Ang white ribbon nagpasabot sa transparency, accountability, ug maayong panggobyerno, ug nakadawat kini og suporta sa kapin 20 ka lugar sa tibuok nasud, lakip na ang Angeles, Bacolod, Baguio, Bulacan, Butuan, Cagayan de Oro, Cebu City, Daet, Davao City, Dumaguete, Iloilo City, Laoag, Legazpi, Naga, Metro Manila, Nueva Vizcaya, Olongapo, Pangasinan, San Fernando, Tuguegarao, ug Virac.
Gipagula ang direktiba human sa sunod-sunod nga bagyo ug linog sa nasud, lakip na ang kusog nga linog sa Bogo City, Cebu, ug ang duha ka kusog nga pag-uyog nga 7.4 ug 6.9 magnitude sa Davao Oriental.
Gani, gipaambit ni Cebu Archbishop Abet Uy ang ilang kasinatian sa paghatud sa mga hinabang sa mga napektuhan sa linog diin gawas sa mga pagkaon ug mga butang nga magamit kay nitunol usab sila og tag P10,000 sa mga namatyan nga pamilya ug natandog ang Arsobispo sa usa sa mga nahatagan og financial gumikan nahatagan kini P40,000 diin upat usab ang nawala nga minahal sa kinabuhi.
Matud ni Archbishop Uy nga siya mismo naglisod og buhi og pulong apan gisiguro niini nga wala nag-inusara ang maong indibidwal bisan paman nga nangahurot ang iyang pamilya sa katalagman. | via Bombo Rocky Lavarez
