Gipaubos sa red alert ang tibuok Visayas power grid gahapon, Miyerkules sa hapon, human ang nahitabong transmission line fault ug emergency plant shutdown maong mas mubo ang nahabiling suplay sa kuryente itandi sa gikinahanglan sa mga konsumidor.
Sumala sa National Grid Corporation of the Philippines (NGCP), ang maong kakuwang sa suplay nagdala og risgo sa posibleng rotational brownout alang sa mga residente ug negosyo sa Sugbo.
Ang maong red alert opisyal nga ideklara kung ang suplay dili na paigo sa panginahanglan sa publiko ug sa gikinahanglang regulatory reserve aron mapabilin nga stable ang sistema.
Giklaro sa NGCP nga mas seryoso kini nga kahimtang kumpara sa yellow alert, diin nipis lang ang reserba apan nasustinihan pa ang demand. Sa kasamtangan, mikabat ngadto sa 1,092.8 MW nga kapasidad sa kuryente ang dili magamit sa grid tungod sa nagkalubha nga forced outage sa 31 ka power plants sa tibuok Visayas, diin lakip niini ang napulo nga nangapawong karong bulhana, upat niadtong Hunyo, pito niadtong Mayo, usa niadtong Marso, ug pito ka mga planta nga dugay nang naguba gikan pa niadtong mga tuig 2021 hangtod 2025.
Gawas niini, aduna pay dugang 14 ka planta ang nagdagan karon apan anaa lang sa limitado o derated nga kapasidad tungod sa problema sa mga karaan nga imprastraktura.
