CEBU – Wala magkuwang ug maayo lang ang dagan sa North ug South Bus Terminal, isip pagpangandam usab sa pagbalik sa klase.
Gibutyag ni Carmen Quijano, ang general manager sa naasoy nga mga bus terminal, nga sa pagbalik sa klase gilauman nila ang pagdagsa sa mga pasahero hayan awhag niini sa publiko nga ipadayon ang pagsul-ob ug facemask.
Hinuon, masaligon kini nga ning menus ang COVID ilabi na nga mayorya sa mga tawo kay bakunado na.
Samtang, nanawagan usab si Quijano sa mga bus ilabi na ang mga mini bus nga dili mag-parking gawas o sa atbang sa South Bus Terminal gumikan kay delikado kini sa disgrasya.
Matud pa, anaa may sulod sa terminal nga mahimo sila nga maka-park diin layo pa sa disgrasya.
Gidugang pa, nga ang mga pasahero mismo kay iyahang giawhag nga sa sulod sa terminal musakay ug dili sa gawas.
Subay niini, nanawagan usab si Quijano sa Cebu City Traffic Office (CCTO) nga hatagan ug pagtagad ang iyahang reklamo kalabot niining mga bus nga naa na nag-park sa gawas nga bahin sa South Bus Terminal.
