CEBU – Ipaubos sa tulo ka buwan nga review ug evaluation ang tanan nga mga district ug provincial hospital sa Probinsiya sa Sugbo isip kabahin sa paningkamot sa Probinsiya sa pagpalambo sa ilang serbisyo.
Kini ang gipahibalo ni Gobernador Gwendolyn Garcia, pinaagi sa opisyal, nga ang maong lakang magsusi sa kahimtang karon sa mga tambalanan ug mangitag solusyon sa mga problema nga ilang masugatan atol sa evaluation process.
Ang ebalwasyon maoy resulta sa pakigtagbo ni Garcia sa mga pangulo sa upat ka provincial hospitals ug 12 ka district hospital niadtong Biyernes, Oktubre 14, 2022, aron hisgotan ang maong butang.
Atol sa tigom, nipahimangno si Garcia sa mga hospital personnel nga kanunayng limpyo ug hapsay ang ilang mga pasilidad ug patas ang pagtagad sa ilang mga pasyente.
Ang tulo ka bulan nga evaluation period magsugod sa Nobyembre 2022 hangtod sa Enero sunod tuig.
