Gipangdagsa na ang duha ka provincial bus terminals sa Sugbo nunot sa nagkaduol nga adlaw sa Pasko ug Bag-ong Tuig.
Kini ang gisaysay ni Ahmed Cuizon, ang Head Administrator sa Cebu North ug South Bus Terminals sa eksklusibong pakighinabi niini sa Bombo Radyo Cebu News Team.
Sumala ni Cuizon nga ubay-ubay na ang mga pasaherong naguli sa amihanan ug habagatang probinsya sa mga nakalabayng adlaw.
Gani base sa ilang datos kay sa Cebu North Bus Terminal (CNBT) kay adunay 6-8,000 daily passengers matag adlaw samtang sa Cebu South Bus Terminal (CSBT) miabot kini sa 12-17,000 ka mga pasahero kada adlaw sukad niadtong Disyembre 19.
Usa sa mga nag-unang rason niini ang pagtaklob na sa klase sa mga tunghaan para sa mga estudyante ingon man ang gipaabot nila karon ang pagdagsa napud sa mga trabahanteng manguliay aron magsaulog sa Pasko sa ilang mga tagsa-tagsa ka probinsya.
Dugang pa sa opisyal nga nakapangandam na sila sa dagsa sa mga pasahero sa ilang pagpalambo sa terminal sama sa mga bag-ong gang-type lobby chairs, limpyo nga mga pansayan ug ingon man ang pagpahugot sa seguridad aron luwas ang katawhang publiko nga muabot sa mga terminal sa bus sa lalawigan.
Sa natad sa seguridad, ang natukod nga Bus Terminal Task Force nga aprobado sa Office of the Governor sa Kapitolyo sa Sugbo kay maoy gitahasan sa pagpatuman sa “One Entrance, One Exit” policy aron hapsay ang foot traffic, pagpamalit sa ticket, ug health and safety concerns.
Giabagan sab sa kapulisan ug ubang unipormadong personahe sa LTFRB ug LTO ang bus terminals aron sa pag-deter sa kriminalidad sa mga pasahero, draybers, ug operators.
Pahimangno sa opisyal sa publiko nga lugwayan ang pasensya kung mubyahe pinaagi sa mga bus terminals tungod napud sa grabeng dagsa sa uban pasahero nga manghimulos sa holiday season nga manguli sa ilang mga probinsya.
