Gipasabot ni Gobernador Gwen Garcia ang mga kritiko sa P20 matag kilo nga programa sa bugas sa Department of Agriculture, nga kini nga inisyatiba gituyo aron matabangan ang mga kabus nga pamilya ug dili magsilbi sa politikanhong interes.
Ang Probinsiya sa Sugbo gipaabot nga mahimong labing unang LGU sa Kabisay-an nga makapatuman sa maong programa sugod pa sa sunod semana, tungod kay nagpahigayon na kini og susamang P20/kilo nga programa sa bugas nga gitawag og Sugbo Merkadong Barato (SMB) initiative sukad niadtong Nobyembre 2023.
Gani, ang ubang mga Gobernador sa Kabisay-an nga mianhi sa Sugbo niadtong Abril 23 nipadayag og pagkamalaumon sa malampusong paglusad sa programa tungod kay mahimo ra nilang sagopon ug i-tweak ang “Cebu Model”.
Si Agriculture Secretary Francisco Tiu Laurel Jr. niingon nga ang nasudnong kagamhanan molusad sa programa sa sinugdanan sa Kabisay-an ug sa kadugayan sa tibuok nasud, uban sa partner nga mga local government units sama sa Cebu Province nga moabaga sa labing menos katunga sa subsidy nga gitakda sa P6.50 matag kilo.
Atol sa coordination meeting, gibutyag ni Gobernador Gwen nga ang mga component cities ug munisipyo sa Sugbo mahimong magsugod na sa pag-withdraw sa stocks sa bugas karong weekend gikan sa bodega sa Kapitolyo aron makabaligya na sila og bugas sa sayo pa sa Lunes.
