CEBU-Nipadayag ang Cebu Provincial Government, kauban ang Mandaue City ug Lapu-Lapu City sa ilang hingpit nga suporta sa Cebu City Government kalabot sa umaabot nga Palarong Pambansa 2024 karong Hulyo.
Mao kini ang gikasabotan sa Governor’s Office niadtong Mayo 15 nga gitambungan nilang Cebu City Acting Mayor Raymond Alvin Garcia, Lapu-Lapu City Mayor Junard “Ahong” Chan, ug Mandaue City Mayor Jonas Cortes.
Anaa usab ang presenya nila ni Cebu City Acting Vice Mayor Dondon Hontiveros; Board Members Glenn Soco ug Victoria Corominas-Toribio; ug Cebu City OIC Administrator Atty. Kristine Joyce Batucan.
Matud ni Cebu Governor Gwendolyn Garcia nga kung makahimo sa pagtinabangay dili lamang kini sports activity gumikan mamahimo usab sa economic activity diin makabenepisyo sa mga konstituwente, bisan sila gikan sa syudad, probinsya o sa mga highly urbanized nga mga lungsod.
Ingon man nga arun mahimong pormal ang panaghiusa, ang upat ka LGUs gikatakdang mopalabang og mga resolusyon nga magtugot sa ilang mga chief executives sa pagpirma og memorandum of agreement aron mabutangan og puwersa ang ilang kolaborasyon nga mga posisyon alang sa umaabot nga national sporting event.
Gihangup ni Mayor Cortes ug Mayor Chan Ang maong plano, ug nipadayag sa ilang kaandam nga mo-suporta sa Palarong Pambansa.
Gani si Mayor Chan gusto pud niini ipagamit ang Lapu-Lapu City’s Hoops Dome, alang sa palaro ug andam usab nga ipagamit ni Mayor Cortes ang mga facility sa mandaue arun mo-host sa arnis ug sepak takraw.
