CEBU – Gitan-aw karon sa Kagamhanan sa Probinsiya sa Sugbo ug sa Department of National Defense (DND) ang posibilidad nga gamiton ang “expropriated lots” isip relocation site sa Visayas Command headquarters.
Gihisgutan ni Cebu Governor Gwendolyn Garcia atol sa iyang pakigtagbo sa mga opisyal sa DND pinangulohan ni Assistant Secretary Emmanuel Anthony Ramos nga ang “expropriated lots” sa Camp Lapu-Lapu sa Barangay Lahug, Cebu City, nga gidonar sa nasudnong kagamhanan ngadto sa DND ug adunay luna sa 12 ka ektarya, isip posibleng relokasyon nga dapit alang sa hedkuwarter sa militar.
Ang lote sa lungsod sa Medellin, amihanang bahin sa Sugbo gitumbok usab atol sa tigom nga laing dapit diin mahimong butangan sa militar ang ilang headquarters.
Si Garcia niingon nga gusto na niya nga mopahawa ang militar sa lote nga gipanag-iya sa Kapitolyo aron iyang mapalambo ang lugar, makakuha og kita niini ug makatigom og pundo alang sa ilang nagkadaiyang proyekto sa tibuok lalawigan.
Nabawi ni Gobernador Garcia ang lote niadtong Oktubre kay napakyas kuno ang militar sa pagsunod sa nalatid sa kontrata.
